کہتے ہیں کہ کسی بھولے بھالے انسان کو کہیں راستے سے قیمتی یواقیت و جواہر کی ایک تھیلی مل گئی، اس نے اٹھائی کھولی تو دیکھ کر خوش ہو گیا، کہ چلو فصل بھی پکی ہوئی ہے، چڑیاں اڑانے کے لیے روزانہ ان گھڑے پتھر اور کنکر غلیل میں پھینکنا پڑتے ہیں، آج تو بہت آسانی ہو گی، کہ کیسے نرم ملائم پتھر ملے، غلیل میں رکھ کر پھینکنے کا مزہ بھی آئے گا، چنانچہ اس نے تھیلی ہاتھ میں پکڑی، غلیل پہلے ہی پاس موجود تھی، فصل کے کنارے ایک اونچی جگہ پر بیٹھ گیا اور غلیل چلانے لگا، چڑیاں اڑانے لگا، یہاں تک کہ اس نے تقریباً ساری تھیلی اس عمل میں اڑا دی، صرف چند پتھر رہ گئے تو اسکو شہر میں ایک کام یاد آگیا، وہ اسی طرح ان چند موتیوں کو ہاتھ میں رکھے شہر پہنچا، شہر کے داخلی دروازے کے ساتھ ہی جوہریوں کی دکانیں تھیں، ایک جوہری کی نظر کسان کے ہاتھ میں موجود موتی پر پڑی، تو وہ دوڑ کے آیا اور کہنے لگا، میں تم سے یہ موتی 60 ہزار میں خریدنا چاہتا ہوں، اتنے میں دوسرا جوہری بھی آ گیا، اس نے کہا، میں 80 ہزار دینے کے لیے تیار ہوں، تیسرا آیا تو اس نے اس سے بھی زیادہ ریٹ بتایا تو کسان بیٹھ کے رونے لگا، انہوں نے پوچھا بھائی، اس میں رونے والی کونسی بات ہے، اگر سودا نہیں منظور نہ دو لیکن رونے کا کیا مطلب؟؟؟ اس نے کہا تم ایک ایک موتی کی اتنی بھاری قیمت دینے پر آمادہ ہو، مجھے تو ان قیمتی موتیوں سے بھری ہوئی پوری تھیلی ملی تھی، ہائے افسوس کہ میں ان کی قدر نہ کر سکا، اور قیمتی اثاثہ ضائع کر بیٹھا۔ اسی طرح وقت بھی بہت قیمتی چیز ہے، گزر جائے تو دنیا کی ساری دولت دے کر بھی ایک لمحہ لٹایا نہیں جا سکتا، اس کی گھڑیاں🕰️ یواقیت و جواہر سے کہیں زیادہ قیمتی ہوتی ہیں۔ وقت کی پکار کو سنجیدگی سے سننے اور مناسب حکمت عملی تشکیل دینے کا بھی ایک وقت ہوتا ہے۔ وقت کے تساھل و تکاسل سے گذر جانے کے بعد آنے والی نسلیں کف افسوس ملتی رہ جاتی ہیں، لیکن اسوقت غصہ سے دانت پیسنے کے سوا کوئی چارہ کار نہیں ہوتا۔ جب سے ایف-اے-ٹی-ایف کی کوکھ سے قانون وقف املاک نے کسی یہودی یا نصرانی کے استدراج کے نتیجے میں اچانک جنم لیا ہے، اسی وقت سے جہاں بین لوگ گہری تشویش کا شکار ہیں، اور اس بل کے مفاسد اور مضرات کی وجہ سے اسکی منسوخی چاہتے ہیں نباض عصر، ضیاء الامت، حضرت جسٹس پیر محمد کرم شاہ الازہری رحمۃ اللّٰہ علیہ کے فرزند ارجمند، آپکی علمی، فکری، اور روحانی میراث کے کامل وارث، عالمی حالات پر، عقابی نظر رکھنے والی، بہت گہرے شعور کی حامل شخصیت حضرت قبلہ پیر محمد امین الحسنات شاہ صاحب مدظلہ العالی بھی ان ارباب بصیرت میں سے ایک منفرد شخصیت ہیں، جو پہلے دن سے انتہائی متانت، سنجیدگی، جرأت اور وقار کے ساتھ اس بل کو ختم کروانے کے لیے کوشاں ہیں، آپ نے پہلے اسلام آباد میں دو بھر پور اجلاس بلائے، اور اب تیسرے اجلاس کا اہتمام عروس البلاد کراچی میں کیا گیا، آپ مشائخ کو یہی باور کروانا چاہتے ہیں کہ ہم اس بھولے بھالے کسان کی طرح نہ بنیں، جس نے قیمتی موتیوں کی تھیلی غلیل چلانے میں ضائع کر دی، وقت کی یہ گھڑیاں ہمارے لیے، اس یواقیت و جواہر کی تھیلی سے زیادہ قیمتی ہیں، اگر اس قانون نے عملی نفاذ کی ہلکی سی انگڑائی بھی لی تو علماء و مشائخ اپنے بزرگوں کی صدیوں کی میراث سے محروم ہو جائیں گے، بلکہ بیگانے کر دیئے جائیں گے